País de voluntarios

A verdade sobre a conciencia solidaria saíu onte a debate. O responsable da
Área Formativa da Confederación Don Bosco, Roberto Fernández Cartón, aludiu
ó concepto de "voluntario de ficción'' como aquel que "ten a súa experiencia
solidaria e logo queda tranquilo'', un concepto que, segundo dixo, lle dá
"medo''. Fernández Cartón explicou que "voluntario é sinónimo de
conciencia'', e non ir a facer algo e "ver o que dan'' a cambio. Ademais,
quixo salientar, como ratio, que "por cada profesional hai 30 ou 40
voluntarios que realizan unha actividade e non cobran''.

Fernández Cartón realizou estas afirmacións onte, no marco da primeira
xornada do I Foro de Voluntariado (Forovol) organizado pola Xunta e que
reúne, ata mañá no Palacio de Congresos de Santiago, a representantes de
organizacións relacionadas coa actividade voluntaria, que debaten e poñen en
común as súas ideas sobre voluntariado social e ambiental. Na primeira mesa
redonda da mañá, baixo o título de 'Situación do voluntario na comunidade
galega', o director de Cáritas Diocesana de Santiago, José Montes Pérez,
tamén quixo facer referencia á acepción de voluntario, concepto que, segundo
indicou, se expande a outros ámbitos. Así, sendo un "servicio xeneroso'',
dixo, "podemos ser voluntarios no noso traballo de cada día, con gratuidade,
solidariedade e xenerosidade coa xente coa que nos vamos atopando'', tanto
no "ámbito do traballo como do noso vecindario', afirmou José Montes.

A recepción do colaborador desde o suxeito activo\

Moderados polo Subdirector Xeral do Voluntariado, da Consellería de Familia,
Ricardo Vecillas Rojo, os participantes na mesa redonda expuxeron as
diferentes actividades coas que teñen contacto desde as súas organizacións.
Así, Manuel De Lario Alquezar, da Confederación Galega de Minusválidos
(Cogami), explicou que "as persoas discapacitadas, cando reciben un
voluntario, fanno non como suxeito pasivo, senón como clientes, e participan
coa persona, polo que existe unha relación activa entre voluntario e quen
recibe o servicio''.

Pola súa parte, o subdirector Xeral de Protección Civil, José
Francisco Alonso Picón, explicou que desde esta organización realizan "un
servicio público''. En cifras, indicou que actualmente "hai 190 agrupacións
(para pouco máis de 300 concellos) de voluntarios de Protección Civil en
Galicia e un total de 8.000 voluntarios''. De feito, nas zonas costeiras
"non queda concello sen agrupación'', e trátase dun "modelo copiado e tomado
como exemplo por outras comunidades'', explicou Alonso Picón, que quixo
resaltar que esta xente "son dunha caste especial''. Recoñeceu sentirse
orgulloso do "gran labor'' que realizaron co Prestige, 'sobre todo na Costa
da Morte'', así como que "van ser claves no Xacobeo 2004''. "Gústame ser un
voluntario e falar coma un deles'', afirmou.

Na mesa redonda de primeira hora da mañá tamén interviron Teodora
Vieiro Nogueira, da agrupación galega Argallando e o presidente de Amigos da
Terra, Xulio López.