Xulio López: "Os voluntarios non son de tránsito"

Xulio López é o director da organización ecoloxista Asociación Amigos da
Terra de Ourense

¿Con que obxectivos nace esta asociación?
Amigos da Terra Galicia naceu hai sete anos e medio e ten como obxectivos
principais a defensa do medio natural e a estimulación da participación
social.

¿De que xeito promovedes esta mobilización cidadá?
A nosa asociación creou o Centro Iris de servicios ambientais. Nel contamos
cun departamento de asesoría xurídica e documentación que promove calquera
tipo de denuncia referida ó medio. Tamén temos un punto de información
ecolóxica; unha base de datos, onde se informan dos cursos, das bolsas ou
das subvencións existentes e tamén contamos cunha área medioambiental e de
sensibilización, que funciona principalmente cos centros de ensino e grupos
escolares.
Amigos da Terra colabora co Programa Xuventude da Unión Europea, ¿en que
consiste?
Calquera rapaz menor de 25 anos pode optar a este programa de voluntariado,
onde o que se fai é colaborar en proxectos promovidos por asociacións de
diversos países. Os voluntarios que decidiron vir aquí están a colaborar en
tarefas de educación ambiental, no seguimento e supervisión de tarefas de
cooperación en Latinoamérica, de restauración ambiental e de sensibilización
e reivindicación. Normalmente, os rapaces escollen aquelas actividades que
están máis relacionadas co ámbito que están a estudiar ou ó que se van
dedicar no futuro.

¿Cal é o aspecto do programa que máis destacarías?
A verdade é que é un proxecto moi interesante que che ofrece a posibilidade
de estar de 6 a 12 meses aprendendo novas culturas, novas técnicas e
convivindo con persoas diferentes. Isto constitúe unha grande experiencia
que ademais está moi valorada nos currículos. E, por outro lado, hai que
destacar que as actividades están subvencionadas. Os voluntarios reciben 300
euros mensuais para gastos persoais e manutención ademais de vivenda e apoio
lingüístico.

¿Existe unha maior concienciación ecoloxista na sociedade?
A crise do Prestige supuxo un grande auxe da participación social. Sen
embargo, a retención destes voluntarios hoxe en día é moi pequena, non sei
se por un fallo de captación pola nosa parte ou porque a xente responde de
xeito impulsivo ante unha determinada situación. O que si podo dicir é que o
voluntariado non adoita ser de tránsito, senón que a súa permanencia é
grande, e canto maior sexa o grao de implicación, maior será o grao de
satisfacción e sentimento de utilidade das persoas