O impulso ecolóxico que avivou o Prestige deixou pouco poso»

Con apenas seis anos de andadura na cidade o Centro Iris -asociación
ecoloxista dependente de Amigos da Terra- tense convertido nun referente
na defensa do medioambente. O xerente e portavoz e un biólogo de 31 anos
que traballa cun equipo de xente nova -a media de edade está nos 27-.
Pero Xulio López non se chama a engano: «A xente entende que a defensa
do medioambente é importante, pero non se move moito, pensa que teñen
que facelo outros».

-¿Non hai unha conciencia emerxente?

-A houbo hai un ano, porque o desastre do Prestige avivou as conciencias
e a xente reaccionou impulsivamente, pero aínda que deixou poso, foi
pouco.

-¿Só as catástrofes espolean as conciencias?

-As grandes catástrofes, porque as miudas, as de todos os días que non
teñen tanta repercusión, pasan desapercibidas, como é o caso do viudeiro
de Montederramo, incluído pola Xunta na rede Natura 2000 e que, sin
embargo está a permitir nel un proxecto privado de explotación
cinexética.

-¿Pouca conciencia ecolóxica para moitas asociacións?

-Efectivamente, o ecoloxista é dos movementos sociais máis atomizados.
Hai moitas asociacións que ademáis se parecen, pero que en absoluto son
iguais aínda que sexa só por cuestións de matices.

-Vincúlase ecoloxismo con esquerda, ¿é así?

-Aínda que hai de todo, sole ser así. Nos nosos estatutos queda claro,
por exemplo, que o movemento non está ligado a correntes políticas, pero
na práctica, a maioría dos militantes son xente de esquerda, aínda que,
xa digo, hai de todo.