Os ecoloxistas piden unha Vicepresidencia para a sostibilidade

As principais organizacións ecoloxistas de ámbito estatal consideran que o
próximo goberno debería crear unha Vicepresidencia para a sostibilidade,
“encargada expresamente de coordenar as políticas de sostibilidade
distribuídas polos distintos ministerios”. Polo que xa se sabe do novo
goberno, a creación desta Vicepresidencia non figura nos plans de Zapatero.
Os ecoloxistas reclaman tamén que o Ministerio do Ambiente, que dirixirá
Cristina Narbona, teña “un peso político e orzamentario suficiente”.

O fortalecemento do Ministerio do Ambiente é preciso “para afrontar os
compromisos ambientais asumidos polo PSOE, en especial, a derrogación do
Plano Hidrolóxico Nacional (PHN) e o abandono do Transvase do Ebro, o
estrito cumprimento do Protocolo de Quioto e o peche das centrais
nucleares”.

Antes da campaña electoral, Amigos de la Tierra, Ecologistas en Acción,
Greenpeace, SEO/Birdlife e WWF/Adena presentaron o documento conxunto “Un
programa por la Tierra”, no
“que se recollen as súas demandas para a vindeira lexislatura". Segundo os
ecoloxistas, boa parte das reivindicacións deste documento foron asumidas
por Zapatero e pola futura ministra do ambiente. As devanditas organizacións
agardan que “esa preocupación agora se concrete en accións políticas”.

“Após oito anos de desencontros coa administración ambiental, cimentados en
boa medida por un Plano Hidrolóxico Nacional tachado de absolutamente
insostíbel polas organizacións ecoloxistas e a desaparición de feito do
Consello Asesor de Medio Ambiente, as ONGs ambientais recibiron con gran
expectación e esperanza os resultados do pasado 14 de marzo, especialmente
despois dos compromisos reiterados por Rodríguez Zapatero”.