A queima do lixo en vertedoiros municipais provoca algúns lumes forestais


Só unha pequena parte dos lumes teñen a súa orixe en neglixencias, en causas
humanas non intencionadas, mais dado o elevado número de incendios no noso
país, uns 11.000 anuais, a súa importancia cuantitativa é considerábel. O 18
% dos incendios provocados por neglixencias débense a escapes de lume en
vertedoiros municipais nos que se incinera o lixo e a outras queimas de
lixo. O Comité de Defensa do Monte Galego de Ourense denuncia a
contaminación e o risco de incendios que provacan vertedoiros municipais
como os de Celanova, Verín ou Viana do Bolo.



O Comité de Defensa do Monte Galego, unha plataforma creada en 2002 en
Ourense e integrada por diversas organizacións sociais e políticas (ADEGA,
Amigos da Terra, Coto do Frade, CCOO, CIG,...) lembra que unha boa parte dos
vertedoiros municipais de lixo da provincia de Ourense son perigosos focos
de contaminación e orixe de lumes forestais ao se empregar habitualmente o
lume para "eliminar" lixo.

Entre os vertedoiros municipais que teñen orixinado lumes na provincia de
Ourense están o de Celanova, o de Padrenda, o de Verín, o de Viana do Bolo,
o de Bande e o de Xinzo de Limia.

Organizacións que forman parte do Comité teñen presentado numerosas
denuncias perante a Delegación Provincial da Consellería de Medio Ambiente
sen teren obtido até hoxe ningunha resposta.