Deciden afortalar o Comité de Defensa do Monte Galego

Un conxunto de organizacións diversas (ecoloxistas, sindicais,
políticas,...) presentaron hoxe o manifesto "Defendamos o monte, apaguemos o
lume. O mundo rural existe". O manifesto, ao que previsibelmente se sumarán
novas organizacións nas próximas semanas, demanda "políticas de
desenvolvimento rural sostíbel que poñan en valor os nosos montes, que
devolvan a xente, a vida, o respecto e o coidado pola terra a tantas partes
e territorios do noso país hoxe deixados a ermo".

As organizacións asinantes do manifesto decidiron fortalecer e ampliar o
Comité de Defensa do Monte Galego, creado en Ourense en 2002, como
plataforma desde a que promoveren accións conxuntas.

O texto do manifesto é o seguinte:

"DEFENDAMOS O MONTE, APAGUEMOS O LUME.
O MUNDO RURAL GALEGO EXISTE!

Cada ano desde que temos memoria repítense as mesmas imaxes cincentas e
negras coma sombras, as mesmas cifras temíbeis, as mesmas excusas e
desculpas, e as mesmas comparacións que só serven para confortar aos
neglixentes.

Non son unicamente unha desgraza, tampouco má sorte, menos aínda unha
condena que Galiza teña que levar ás súas costas.

Esas imaxes pódense evitar, esas cifras pódense anular, e esas excusas de
mal pagador pódense substituír por solucións e políticas coherentes.

Este convencimento é o que nos dá forza hoxe para traballar unidos, para
pórnos en acción como cidadáns solidarios para afrontarmos entre todos un
problema que é de toda a sociedade.

Acabar coa desfeita periódica do lume que converte cada verán os nosos
montes nun territorio catastrófico é traballo de todos. Mais pór os meios,
as políticas e as decisións que se precisan é responsabilidade do Goberno.

A ese goberno responsábel dirixímonos mirando cara adiante. Oferecemos a
nosa cooperación para habilitar eses meios. Oferecemos o noso coñecimento, a
nosa experiencia e a nosa imaxinación para deseñar esas novas políticas que
conformen unha alternativa ao fracaso das actuais.

Nós somos dos que cremos que hai solucións para o drama do lume no noso país
e un futuro mellor que substitúa o abandono e descoido dos nosos montes.

A ese goberno responsábel dirixímonos para pedirlle o debate público e
aberto e a deliberación colectiva sen prexuízos e sen partidismos que deben
preceder a necesaria e urxente toma de decisións.

Pomos o mellor que temos: compromiso co país e convencimento na existencia
de solucións viábeis e ao alcance da nosa man.

Reclamamos tolerancia cero cos incendiarios que prenden lume aos nosos
montes, valéndose do desinterese e a neglixencia do goberno na preservación
do noso patrimonio natural.

Reclamamos tolerancia cero cos especuladores do lume, que alimentan os
incendios coa estupidez e a cobiza que só lles corresponde a eles, mais
desde a confianza de quen a día de hoxe se sabe impune para arrepañar os
beneficios.


Sabemos ben que o final da indefensión dos nosos montes, fronte a quen lles
planta lume movido pola avaricia ou a inconsciencia, nunca será posíbel nin
certo sen que remate este abandono insoportábel desde o goberno que deixa
indefenso o noso mundo rural sen coidado e sen respecto.

Esiximos acción total e urxente para defender o medio rural galego. O seu
incalculábel valor como parte de nós mesmos e do que é este país, non pode
seguir deixado á súa sorte pola apatía e a desgana das políticas pasivas e
exclusivamente reactivas duns gobernos que permiten que a malumada devore
primeiro a riqueza dos nosos montes e o lume reduza despois a súa vida a
cinza, mentres pagamos cada ano máis cara a factura de sofocar tanta
incompetencia e falla de previsión.

Demandamos que Galiza deixe de arder porque así debe ser e porque pode ser.
Declaramos a Galiza país libre de lumes. Sabemos como logralo. Sen
demagoxia, sen mentiras e sen propaganda. Os incendios apáganse para sempre
con empeño e constancia, con políticas que incidan nas causas estruturais
que os provocan, e restituíndolle ao rural galego o protagonismo e o
compromiso que desde hai tempo de máis se lle debe.

Propomos e demandamos do goberno políticas de desenvolvimento rural sostíbel
que poñan en valor os nosos montes, que devolvan a xente, a vida, o respecto
e o coidado pola terra a tantas partes e territorios do noso país hoxe
deixados a ermo, á soedade e á indiferenza; políticas agrarias e de
desenvolvimento rural que limpen as décadas de desamparo, deixación e
desprezo por parte de gobernos que nin entenden nin saben do seu valor e
significado.


Defendamos o monte dos incendios, do abandono e do esquecimento, da mentira
e da incompetencia. Apaguemos todos os lumes entre todos e para sempre".

O manifesto foi asinado inicialmente polas seguintes organizacións:

Amigos da Terra, Asociación de Criadores de Ovino e Caprino (OVICA),
Asociación para a Defensa Ecolóxica de Galiza (ADEGA), Asociación
Profesional de Axentes Forestais de Galicia (APRAFOGA), Bloque Nacionalista
Galego (BNG), Confederación Intersindical Galega (CIG), Esquerda
Unida-Izquierda Unida (EU-IU), Federación Ecoloxista Galega (FEG), Fundación
Xermán Estévez para a Protección da Natureza, Sindicato Labrego
Galego-Comisións Labregas (SLG-CCLL), Sindicato Nacional de Comisións
Obreiras (CCOO) de Galicia, Sociedade Deportiva Sindrán, Terreo
Cinexeticamente Ordenado (TECOR) "Os Castros", Unión General de Trabajadores
(UGT-Galicia) e Unión de TECORES de Galicia (UNITEGA).