A formación en ecoloxismo non só se ten que facer cos nenos»

Entrevista a Xulio López

Coincidindo co sétimo aniversario da creación do Centro Iris en Ourense, o
primeiro aberto en España dentro da formación ecoloxista Amigos da Terra, o
colectivo pon en marcha un seminario sobre cooperación internacional no
ámbeto ambiental.

-¿A quen vai dirixida esta iniciativa?

-A outras asociacións e oenegés que traballan neste ámbeto, e tamén a
representantes de organismos e institucións. Coidamos que a formación en
ecoloxismo non só se ten que facer cos nenos, porque realmente a xente que
toma decisións referentes a medio ambiente son adultos que tamén precisan
ser formados.

-Veñen de cumprir sete anos, ¿cal diría vostede que é a saúde do centro?

-Penso que é boa. Este centro foi aberto de xeito experimental e conseguimos
convencer durante os dous primeiros anos á organización matriz, que é Amigos
de la Tierra España, de que isto tiña futuro. Despois abrimos Madrid,
Veléz-Málaga e para o 2005 empezarán a funcionar en Zaragoza e Sevilla.

-¿E tamén están satisfeitos cos resultados?

-Neste tempo tramitamos un milleiro de queixas e denuncias. Lamentablemente
non demasiadas tiveron resposta e remataron perdidas nos despachos. Pero si
que conquerimos moitas cousas, desde a paralización de canteiras ata
sancións por verquidos ou a clausura de vertedoiros incontrolados. De
calquera xeito, e afortunadamente, en moitas ocasións o que non se gañou nos
despachos gañouse na sociedade gracias á difusión nos medios de
comunicación. Isto tamén é importante polo que implica de concienciación
cidadán.