Membros de Amigos da Terra participan dun intercambio cunha asociación
ecoloxista húngara

14 colaboradores da Asociación viaxan ao país maxiar para afondar a relación
iniciada no ano 2003 cando un grupo de integrantes da “Gau Green Club”
visitaron Galicia

O xoves 21 de abril unha expedición de 14 voluntarios e traballadores da
asociación Amigos da Terra inicia unha viaxe a Hungría para completar un
intercambio coa asociación GAU Green Club.

A relación con esta asociación ambientalista comezou cando quince membros
desta asociación visitaron Galicia no verán de 2003 para coñecer o
funcionamento de Amigos da Terra e os problemas ambientais do noso
territorio. Tiveron oportunidade de ver o impacto dos incendios, a
concentración parcelaria realizada en varios municipios da Limia e mesmo os
efectos da marea negra do Prestige que por aquel entón aínda estaban moi
patentes en varios puntos da nosa costa. Igualmente visitaron o Parque
Nacional de Illas Atlánticas e realizaron outras visitas de tipo cultural.

Nesta ocasión 14 persoas de Pontevedra e Ourense visitarán o país do leste
europeo e visitarán varios espazos naturais; tamén terán a oportunidade de
coñecer de cerca o funcionamento de granxas de produción biolóxica;
coñecerán algúns dos seus principais problemas ambientais; participarán da
observación de aves e en distintas actividades educativa. Tamén traballarán
no debate sobre os distintos modelos de participación social, ferramentas de
traballo en grupo e metodoloxías para o traballo ecoloxista.

A viaxe aproveitarase tamén para visitar Friends of the Earth Hungary,
Federación internacional da que Amigos da Terra forma parte e que está
presente en sete países.

Xunto cos galegos e o grupo de húngaros anfitrión participará tamén unha
delegación de estonios. O grupo de Galicia viaxará con Edina, Andi e Balaz,
tres húngaros que a día de hoxe están desenvolver en Ourense, nas
dependencias do Centro IRIS de medio ambiente, os programas de Servizo
Voluntario Europeo e Leonardo, respectivamente.