O transporte visto como un mal ambiental

O 60% dos cidadáns opta polo coche privado, o que coloca a Galicia
como a segunda comunidade que máis o usa. Xunto ós incendios e ó
excesivo consumo enerxético e de auga, a ausencia dun servizo de
transporte público óptimo é visto pola sociedade como un dos maiores
problemas ecolóxicos do país

REBECA FERNÁNDEZ

Residuos, transxénicos, auga, bosques, transporte, enerxía... O
planeta sofre un número ilimitado de problemas ambientais que fan
menos sostible o noso día a día. Mensaxes apocalípticas, campañas
verdes e unha serie de medidas para tentar frear a destrución da nosa
contorna introducen esta realidade no noso cotián. Grazas a isto, nos
últimos anos aprendemos a evitar os pilotos vermellos dos aparatos
eléctricos, optar pola ducha en lugar do baño ou separar o lixo.
A conciencia ambiental parece estar instalada entre os galegos. Polo
menos así o rebela a enquisa Fogares e Medio Ambiente feita polo
Instituto Galego de Estatística (IGE) na que un 93% dos cidadáns
asegura ter o medio entre as súas principais preocupacións. Os datos
do estudo rebelan que máis do 90% da familias recorre a métodos para
reducir o consumo de auga e luz e preto do 95% depositan os residuos
nos puntos específicos de recollida. Para confirmar que o verde xa
forma parte da nosa vida, Amigos da Terra decidiu saír á rúa para
coñecer cales son os problemas ambientais que máis preocupan á xente e
aqueles nos que o goberno debería tomar medidas urxentes. Unha pequena
urna foi o medio elixido polos voluntarios da asociación ecoloxista
para que os cidadáns depositasen as súas propostas.

Bosques, enerxía, auga e transporte. Estas foron as catro maiores
preocupacións apuntadas polos preto de cen cidadáns que decidiron
participar na iniciativa ecoloxista. A necesidade de aumentar a
prevención dos incendios e facer reforestacións con especies
autóctonas, apostas polas renovables e mellorar os servizos de
transporte público para depender menos do coche foron as principais
suxestións achegadas. "A proximidade do verán e a proliferación de
campañas que promoven o aforro e a eficiencia poden ser a causa de que
os cidadáns se centren nestas áreas", explica a responsable de Cambio
Climático de Amigos da Terra, Irene Baspino. A sorpresa para ela é o
alto grao de concienciación existente no referente ó transporte. De
feito, dos 42 compromisos que os participantes adquiriron ó longo da
xornada, o 32% estaba relacionado co tema, prometendo coller menos o
coche para usar máis o público. Este aspecto centrou tamén as demandas
á Administración, pedindo o fomento dun verdadeiro transporte
colectivo, mellorando o número e a calidade das conexións dos núcleos
urbanos cos concellos limítrofes. "Isto evidencia que os cidadáns
comezan a ver o transporte como un problema ambiental para o que,
ademais, temos a solución na nosa man", engade Irene Baspino.

Esta é precisamente unha das áreas que peor levamos os galegos.
Segundo a enquisa do IGE, preto do 80% da poboación conta con algún
vehículo propio, que nun 8% dos casos chega ata os tres coches por
vivenda. Así as cousas, un 60% dos cidadáns opta polo seu coche,
fronte ó 18,8% que deciden desprazarse en transporte público. Unha
opción que sitúa Galicia na comunidade que máis usa o coche propio
despois de Canarias, que a supera tan só en dúas décimas. A situación
é máis grave se temos en conta que o coidado e o respecto ó medio non
é un dos motivos que levan estes usuarios a optar polo colectivo: un
49% faino por non dispor de coche, por ser máis cómodo ou menos tenso
un 33% e por non ter carné de conducir o 27%. Nos últimos anos mudamos
os nosos costumes alimenticios, enerxéticos e de consumo. ¿Será agora
o momento de mudar os hábitos na mobilidade? A resposta está nas nosas
mans.

A suxestión: coches oficiais híbridos

Preocupacións, demandas, compromisos... e propostas. Os participantes
na iniciativa de Amigos da Terra realizaron tamén algunhas suxestións
para un mundo máis verde. Destacan a necesidade de obrigar os
supermercados a teren pechadas todas as cámaras frigoríficas,
fomentaren a compra a granel, que os vehículos da Administración sexan
híbridos ou prohibir, por decreto, a tala de árbores autóctonas.

O cambio climático “non existe”

O cambio climático non está entre as preocupacións dos galegos. Un
dato “chamativo” para Irene Baspino, quen destacou a presenza de males
relacionados con este fenómeno como a necesidade de reducir enerxía e
as emisións ou abandonar a incineración do lixo. “Non se ve o cambio
climático como un problema transversal e implícito en todos eses
males”, di Baspina, que ve preciso mellorar a comunicación.

Mudanza dos hábitos, unha realidade

As mudanzas de hábitos nocivos tamén comezan a calar na sociedade.
Segundo a enquisa do IGE, as principais prácticas asimiladas nos nosos
fogares, ademais do uso responsable dos electrodomésticos, son a
desconxelación da comida antes do seu consumo, ter unha papeleira no
baño para non usar o inodoro como cubo do lixo, encher o fregadoiro
para lavar a louza ou a diminución do caudal das billas