Dio di santa Eugenia.

DIO-PROVERBO / Herbacho ne perisas.

ZODIAKO / En la zodiako-signo dil Varsero guvernata dal planeto Urano.

VETERO / Kolda vetero e blua cielo vintrala, cajorne, en Francilia.

KONCIZE

AFGANIA / CIRKUM 200 GERMANA SOLDATI REMPLASOS LA NORVEGIANA KONTINGENTO

Germania sendos 200 homi por rinforcar la trupi dil Federiti di Usa a
nord-Afgania. Tale ita lando refuzas cedar a la presi Usana e di NATO/
OTAN qui volis sendigar Germana trupi a sud-Afgania, ube la kombati
kontre la talibani esas maxim mortigera. Esas ja 3 200 Germana militisti
en Afgania.

SERBIA / AJORNATA SIGNATO POR KOMERCALA INTERKONSENTO-KONTRATO KUN EU/UE

La signato di komercala interkonsento-kontrato inter Europana Uniono e
Serbia ajornesis pro la disputi interne dil Serba guvernerio pri la
futuro di Kosovo. Segun la Europana komisario Olli Rehn, la Serba chefa
ministro Vojislav Kostunica obstruktis ita interkonsento-kontrato por
protestar kontre la recenta Europana decido preparar la sendo di
administro- e polico-komisitaro a Kosovo.

TURKIA / LA PARLAMENTO PERMISAS LA SURHAVO DI KAPTUKO CHE LA
UNIVERSITATO
La deputiti esis adoptonta dum tarda noktala kloko la projeto di
konstitucala modifiko favore a la surhavo dil islamala fulardo che la
universitati. Ica texto, produktita dal islamismista-konserverma
guvernerio Turka, produktis amasala protesto che la partisani di la
laikeso pro ke li timas ke anke permisesos la surhavo dil kaptuko che la
funcioneri e la gimnazii ube dum-instante ol interdiktesas.

Kordiala interretala saluti ad omni. JM :::-:::


Someral' vespero, - krepuskulo-horo. -
Tenerema vento - movas birk-arboro. -
Inter lua branchi - disko yen lunala. -
Nubi parte kovras - lua lumo pala. - Ma
se luno-brilo - povas aparar, - la
jasmino blanka - semblas radiar.