Benitok planteatzen duen galderaren inguruan komentario batzuk egin
nahi nituzke.

Egia da Hauek dira galderak, hauek! ariketa (?) begiratuta, azterketa
baten antza hartzen zaiola eta, hori dela eta, interesgarria
iruditzen zait zerbaiten lanketarako ala zerbait ebaluatzeko den
jakitea. Ariketaren planteamendua ikusita, badirudi lanketarako egina
dela: hainbat galdera arazoa zein den erakusteko, taldekako zuzenketa
eta arrazoiak bilatzeko proposamena, ustez ikasitakoaren aplikazioa
eta ondoren hausnarketarako galdera. Planteamendu bera dute
ariketaren hiru atalek, eta nire ustez, zalantzarik gabe esan daiteke
hainbat gramatika-eduki landu nahi izan direla.

Bestelakoa litzateke azterketa baten izaria. Ez da hor egongo ezer
irakasteko/ikasteko aukerarik. Ikasleak dituen ezagutzak ikusi nahi
dira, besterik gabe.

Jakina, beste kontu bat da edozein ariketa/azterketari klasean ematen
zaion trataera. Azterketa bat erabil daiteke ariketa gisa eta ariketa
azterketa gisa; baina hori irakaslearen nahiaren/ustearen araberakoa
izango da beti ere.

Kontuz ibili behar dugu, nire ustez, klaseratzen ditugun
materialekin. Askotan guk nahi ez dugunerako diseinatuta baitaude.