Kara sioro RODI, kara samideani,

En Hispania la unesma dio di la semano esas “Lundio”, la duesma
“Mardio”, e c. tale pos laborar dum kin dii la Hispani darfas juar
“semano-fino”, to esas du dii vakancala. La Hispana kalendario esas plu
logikoza (e bela) kam ta di ti qui opinionas ke la unesma dio di la
semano esas “Sundio”. En la Hispana kalendario onu vidas kin sinistra
kolumni blanka e du reda kolumni dextra, to esas, onu vidas la
laboro-dii kune e la vakanco-dii anke kune. Beleso e simpleso. Hummm...
ma quo esas beleso?

Pri “puente” me devas dicar a vu ke la defino di ta Hispana vorto relate
la dio laborala inter du dii nelaborala, esas en omna dicionarii di la
linguo Hispana. Adminime en Hispania la bona dicionarii montras la
defino di la vorti quin onu uzas en Hispania ma anke en la frata landi
di Amerika. Ma dio laborebla inter du dii nelaborebla ne sempre divenas
nelaborebla, evidente! Meakaze me laboras omna dii laborebla, do nula
“puente”-dion me juas. Ma certe multa personi ne laboras ta dii, certe,
ma por li singla “puente”-dio implikas un dio minuse en la somerala
periodo vakancala. Itere meaopinione, to quon la Arjentiniani agas
relate la “puente”-dii me prizas, to esas, se ula mardio, merkurdio o
jovdio esas dio nelaborebla lore ta dio divenas laborebla e lundio (o
venerdio) divenas nelaborebla. Saja ed inteligenta decido imitinda.

Do, quo esas por vu “semanofino” ? Ka nur saturdio? E ka “semanokomenco”
esas sundio ?



Amikale salutas vu/vi, de nuboza e pluvoza Hispania (bone, en mea
regiono) ,



Fernando Tejón,

-----------------------------

Membro di la Ido-Societo Hispana

idosocietohispana@yahoogroups.com

ido, sempre adavane!

-----------------------------



-----Mensaje original-----
De: IdoCatalaOccitan@yahoogroups.com
[mailto:IdoCatalaOccitan@yahoogroups.com] En nombre de Eduardo A. Rodi
Enviado el: miércoles, 09 de noviembre de 2005 9:07
Para: IdoCatalaOccitan@yahoogroups.com
Asunto: [IdoCatalaOccitan] Diversaji kulturala



Kara samideani,

Un del problemi quin me questionas me quale solvar, mem se la tota
homaro havus un sola linguo esas la diversaji kulturala. Recente me
spektis interviuvo hike, en Arjentinia a kantisto Hispaniana. Lua nomo
esas Rafael, o Raphael. Me kredas ke il ne uzas sua nomo familiala; e
me ne konocas il, malgre ke onu dicas ke lu esas pasable konocata
hike. Irgakaze, il joketis pri su ipsa en l'interviuvo per dicar "Me
esas quale jovdio". Kande nulu komprenis pro quo il dicis to, il
explikis: "...pro ke me esas sempre meze di omno".

Fakte, anke ta expliko ne suficis por la interviuvisti. E to esas pro
ke li ne savas (e me savas nur hazarde) ke en Hispania, onu konceptas
la semano kom komencanta per lundio, e finanta per sundio. Yen pro quo
jovdio esas la dio meza dil semano, e tale onu komprenas la aludo.
Kontree, en Arjentinia, malgre la uzado di la sama linguo, on
konceptas la semano kom komencanta per sundio, e finanta per saturdio.
E fakte en ta ordino aparas la semano-dii en kalendarii. La unesma
kolumno esas la kolumno reda por sundio. Por ni, la semanodio meza
esas ne jovdio, ma merkurdio. E singla-merkurdie, kande me finas
laborar, me kontentesas per pensar ke on ja trairis un duimo dil
semano.

Ka ne semblas fiktivajo ciencala ke hodie, komencos por me la duesma
duimo dil semano, dum ke en Hispania on devas ankore vartar dum un dio
plusa?

Altrateme, me spektis recente filmo Hispana. Ibe on konstante
aludis "puente". Ma per la kuntexto me komprenis ke onu ne aludis olu
per la signifiko kustumala: "ponto". E tamen me ne komprenis la vera
signifiko. Erste kande me questionis konocato qua rezidis dum kelka
tempo en Hispania, me komprenis ke "puente" esas "dio laborala, inter
du dii nelaborala, qua divenas pro lo, anke nelaborala". To esas
koncepto ne existanta en Arjentinia, ube maxim multa dii nelaborala
muvesas al lundio maxim proxima, tale ke on havas semanofino longa, ma
nula dio "puente".

Vi omna standez bone,

Eduardo.






_____

Enlaces a Yahoo! Grupos

* Para visitar tu grupo en la web, accede a :
http://es.groups.yahoo.com/group/IdoCatalaOccitan/


* Para cancelar tu suscripción a este grupo, envía un mensaje a:
IdoCatalaOccitan-unsubscribe@yahoogroups.com
<mailto:IdoCatalaOccitan-unsubscribe@yahoogroups.com?subject=Unsubscribe
>


* El uso que hagas de Yahoo! Grupos está sujeto a las
Condiciones del servicio de <http://es.docs.yahoo.com/info/utos.html>
Yahoo!.



[Se han eliminado los trozos de este mensaje que no contenían texto]