Kar amiki:
Dum la pasinta Krist-naskala festi me lekteskis romano titulizata “La casa
de los espíritus” (La hemo di la spiriti) da Isabel Allende. Me konfesas ne
spektir la filmo (Glenn Close, Meryl Streep, ...), ma la romano esas tre
lektinda, interesanta e pluse surprizanta nam Isabel Allende per lua chefa
persono, Clara Trueba, parolas pri la avantaji di la linguo internaciona.
En la pagino 277 on povas lektar: (tradukita ad Ido de la Hispana)

“La komunikaji di Clara kun la vaganta anmi e kun la exterterani, eventis
per la telepatio, per la dormi e per pendulo quo el uzis por ta skopo,
sustenante lu en l’aero super alfabeto quo el pozis ordine sur la tablo. La
autonoma movi dil pendulo signalis literi e formacis la mesaji en la Hispana
ed Esperanto, demonstrante tale ke ti esas l’unika lingui qui interesas a la
altradimensionala enti e ne l’Angla, quale Clara dicis en lua letri a
l’ambasadisti di la angle-parolanta landi, sen ke li nultempe respondis, e
ne anke la sucedanta eduko-ministri, quin elu skribis por expozar lua
teorio: vice docar Angla e Franca en la skoli on devus obligar a l’infanti
studiar Esperanto.”

En la pagino 311:

“Elua matro avertis lu pri ne parolar a la skol-mastrini di la avantaji di
Esperanto sur l’Angla.”

Kompreneble Isabel Allende eroris pri la selektita linguo internaciona,
Esperanto, nam Ido esas plu bona, ma probable elu nulo savas pri Ido forsan
pro la manko di sufica informajo...

Kordiale!!
Adrián Pastrana