Kar amiko Takata,

En preirinta mesaji vu aludis "cheese-cakes" (fromajo-kuki). Kande me esis puero
en la regiono Lotringia, on povis komprar che la kuki-vendisti delicoza
fromajo-kuki (gateaux au fromage) kun krematra sukrizita fromajo. Plu tarde
habitanta en altra regioni di Francia me ne plus vidis o trovis oli. Ma, foye,
esante en London, kom desero servesis la sama fromajo-kuki kam en Lotringia.
Esas notinda ke la homi di ca regiono di Francia proxima a la Germana frontiero
tre similesas la Angli, nome li esas tenaca, laborema, kurajoza, entraprezema,
diciplinema ed havas civitalana mento. Altra-latere, esas homi qui esas tre
extravaganta inter li e li esas hipokrita e puritana, e forsan havas la minim
saporoza nutrivi e koquarto di Francia. E, quale la Angli, li manjas
fromajo-kuki. Fine, li aspektas tre simila a la Angli. Esas nula racionala
expliko ad ica simileso inter habitanti di regiono fora ad Anglia e la Angli.
Forsan, la fundamento di la ibala lojantaro esas de Kelta origino e lor la tempo
di la populmigrado (Vma yarcento p.K.) venis Germanali. Me nur povas konjektar
ke la procento de la Kelta e de la Germanala elementi en la lojantaro esas la
sama kam en Anglia e produktis gento qua havas la sama traiti kam lia fora Angla
kuzi. Me ne povas konceptar altra expliko.

Kukema saluti. JM :::-:::