Que bo! Es un cómico moi, moi bo... Utilizas moi ben a retranca. Esa
si é galega 100%, Noraboa!!

O que criticas na primeira parte, pasas a facelo na segunda... Non
paro de rir pola túa ocorrencia...

Para cando un segundo plato?

Ale, saúdos para ti tamén...

Félix.


--- En l-gaita@yahoogroups.com, Inadaptado Total <galegopata@...>
escribió:
>
> O día de celebración do 25ª aniversario do Parlamento de Galicia,
escoitando un programa de radio vespertino, unha coñecida xornalista
catalana preguntáballe, extrañada, á Excma. Sra. Dolores Villarino,
Presidenta do Parlamento Galego, como era posible que, en efeméride
tan sinalada, o acto musical fose de estilo flamenco e
con "cantaores", cando ela agardaría ver e escoitar gaitas e
gaiteiros/as.
>
>
> Abraio, nun primeiro intre, seguido dunha profunda consternación e
indignación, foron os sentimentos que me producíu escoitar a
resposta da Sra. Dolores Villarino: "Es que en Galicia no todo son
gaitas" –ao meu entender, afirmado cun manifesto retrouso
desprezativo-, seguido de que a ela lle encanta o flamenco (gusto e
manifestación cultural moi respectables, faltaría máis), e das tan
de moda tópicas, falaces e retoricamente neoliberais chamadas
á "mestizaje cultural", ao "multiculturalismo enriquecedor",
á "modernidad", etc., semella que entendidas como unha suposta,
e "politicamente correcta", obrigatoriedade moral dos galegos e
galegas ao sacrificio ou á cesión constante e submisa do que nos
identifica como pobo, basicamente a nosa lingua e cultura, para que
outras nos manden ao currunchiño da marxinalidade, coa intención de
crear unha especie de "larapotada cultural" alienadora, e nunca
entendidas, como sempre defendeu o galeguismo
> histórico, de contribución do noso, dende a nosa cultura, ao
universal.
>
>
> Pero, por se isto fose pouco, a Excma. Sra. Presidenta do
Parlamento Galego, segundo recolle a prensa o 21/12/06: "previno
contra quienes pretenden `asimilar determinados instrumentos con
territorios' y recordó que `ni la guitarra es andaluza ni la gaita
es gallega'" ao tempo que tildaba de "ignorantes" aos críticos con
semellante acto que, por certo, superou os 31.000 € de saleroso
gasto para as arcas públicas.
>
>
> Pois ben, eu, que pola noite vin a retransmisión de dito acto
musical na Galega, pensei, inocentemente, que todo se debía a unha
cuestión de simple ignorancia da cultura musical de Galicia por
parte dalgúns políticos que nos gobernan, pero despois de ler as
súas declaracións na prensa, ás que hai que sumar as do Sr. Cuchús
Pimental –"cantaor" no acto-, tachando de ignorantes tamén aos
críticos, non podo máis que afirmar que nos encontramos ante unha
fonda manifestación de autonoxo e un acto de frontal ataque e
desprezo á cultura tradicional musical galega, recoñecida a nivel
europeo como unha das máis ricas. Acaso ignoran esta señora e
señores que gaita e gaiteiro foron, documentalmente dende o S. SVI,
figuras indespensables, e incluso institucionalizadas, en todas as
manifestacións festivas, de traballo, relixiosas, gremiais,
oficiais, etc. en Galicia? E se non querían gaitas, ignoran vostedes
que o patrimonio musical galego conta cunha enorme
> variedade de instrumentos e ritmos onde escolleren? Como pode
afirmar vostede que a gaita galega non se identifica con Galicia nin
forma parte da súa identidade? Acaso ignora a Sra. Villarino que o
Parlamento de Galicia debe ser faro da nosa identidade colectiva?
Como pode unha das máis altas representantes políticas de Galicia
desprezar así, publicamente, ao país e cultura milenarias que
representa?
>
>
> Xa o predixo o prestixioso -e visionario- musicólogo madrileño J.
Inzenga, quen en 1888, admirado ante "el rico caudal de música
popular que aún atesora el privilegiado suelo gallego", advertía de
que os estragos da "locomotora del progreso" imprimirían á nosa
cultura e costumes "un nuevo sello de unidad nacional, asimilándolas
cada vez más a las del resto de nuestra Península, y borrará todos
los elementos que desde época remota forman lo que pudiéramos llamar
su identidad", e vostedes están contribuíndo a cargarse alegremente
a nosa cultura cos nosos cartos. Felicidades!
>
> Ollo Sra. Villarino e demais señores e señoras do PSOE, para a súa
información: o Sr. Fraga Iribarne non inventou a gaita galega,
sabían? e se queren rachar coa "era Fraga" nas formas, por favor,
non se carguen o noso patrimocio musical secular pola súa, si,
brutal ignorancia e desprezo á cultura do País. Por algo o Sr.
Touriño, nos actos de investidura na Praza do Obradoiro xa non
quería nin unha gaita nin "gaiteiradas", ata que alguén lle dixo que
relaxara, que iso, que a gaita non a inventou Fraga.
>
> Agora ben, se isto o fai a Sr. Presidenta do Parlamento del
Noroeste, que non tería tampouco por que ter moita idea do que é a
tradición musical galega (aínda que si un mínimo de respecto polos
que loitaron por termos esa institución), que dicir, deixando claro
que cada un fai o que lle peta, do que están facendo outros/as
actores da escena musical tradicional galega?! Resulta que algúns do
participantes no Quiquiriquí falan no programa de Xurxo Souto e non
se cortan un pelo dicindo que a música tradicional galega ten tufo
rural (de pailán da aldea, faltoulles dicir) e que o que eles/as fan
é facela "contemporánea", sacarlle ese cheiro a brabío que aos nosos
infantes tanto arrapía. Vaia, vaia, están a crear a música
tradicional galega do S. XXI. E que dicir dese outro duo dinámico
que espeta tan pancho a muiñeira de Pontesampaio coa melodía da
Panteira Rosa e declara un deles que "no queiro hacer lo que se ha
hecho siempre". Parece que a tradición
> tamén lle dá tufo rústico-infumable y lo guay del paraguay es el
mestizaje-larapotada. E que dicir dese grupo da Terra Chá luguesa
que critica nun programa de TV a todos eses que fan música galega
babeando-imitando á música irlandesa e despois eles non se cortan un
pelo en largarse alegremente unha chea de rumbas (claro, a rumba,
ritmo galego 100%), seica pasamos de estarmos trepanados polo das
saias e gaitas marcianas de Ourense para conectar cos 40 Latino. En
conclusión: alucino coa ignorancia que os nosos e nosas "novos
valores" da música tradicional, folk... galega teñen da cultura
galega e é que o caudillo o fixo moi ben: borrando a memoria musical-
cultural do pobo xa o tes asimilado.
>
> Un saúdo a todos/as.
>
>
>
> ______________________________________________
> LLama Gratis a cualquier PC del Mundo.
> Llamadas a fijos y móviles desde 1 céntimo por minuto.
> http://es.voice.yahoo.com
>
> [Se han eliminado los trozos de este mensaje que no contenían
texto]
>